ព័ត៌មានទូទៅ

ការវិនិយោគផ្នែកសណ្ឋាគារ ប៊ូទិក កំពុងកើនឡើង

on .

កំណើន​នៃ​ចំនួន​ភ្ញៀវទេសចរ​ដែល​ចូលមក​សម្រាក​លម្ហែកាយ​នៅ​ក្នុង​ប្រទេស​ កម្ពុជា កំពុង​មាន​និន្នាការ​ងាក​ទៅ​ស្នាក់​នៅ​តាម​សណ្ឋាគារ​ប៊ូទិក ដែល​ធ្វើ​ឲ្យ​រយៈពេល​ពីរ​បី​ឆ្នាំ​ចុង​ក្រោយ​នេះ មាន​សន្ទុះ​វិនិយោគ​លើ​វិស័យ​សណ្ឋាគារ​ប៊ូទិក នៅ​ក្នុង​ប្រទេស​កម្ពុជា ពី​សំណាក់​វិនិយោគិន​ក្នុង​ស្រុក និង​មក​ពី​បរទេស រួម​ទាំង​នៅ​រាជធានី​ភ្នំពេញ និង​នៅ​ក្រុង​សៀមរាប ដោយ​ចំនួន​សណ្ឋាគារ​ប៊ូទិក បាន​ហក់​ឡើង​រាប់រយ​ទីតាំង​។

លោក គឹម ឆាយហ៊ាង អភិបាលរង​ខេត្ត​សៀមរាប បាន​ឲ្យ​ដឹង​ថា អំឡុង​ពេល​ពីរ​បី​ឆ្នាំ​ចុង​ក្រោយ​នេះ ហាក់​មាន​ការ​វិវត្ត​ថ្មី​មួយ​នៅ​ក្នុង​ឧស្សាហកម្ម​សណ្ឋាគារ គឺ «​មាន​ចំនួន​គម្រោង​សណ្ឋាគារ​ប៊ូទិក បាន​និង​កំពុង​កើត​ឡើង​ច្រើន នៅ​ទីក្រុង​សៀមរាប ព្រោះ​វា​មាន​តម្រូវ​ការ​ពី​ភ្ញៀវ​ទេសចរ​អន្តរជាតិ​ជាច្រើន ដែល​ពួក​គេ​មាន​ចំណាប់​អារម្មណ៍​លើ​ប្រភេទ​ទីកន្លែង​ស្នាក់​នៅ​របៀប​ប៊ូទិក ជា​ជាង​នៅ​តាម​សណ្ឋាគារ​ធំៗ​»។

លោក​អភិបាលរង​ខេត្ត​រូប​នេះ បាន​ថ្លែង​បន្ត​ថា ៖ «​ឥឡូវ​នេះ យើង​ក៏​ឃើញ​មាន​លំនៅឋាន​រស់នៅ​របស់​ប្រជាជន​នៅ​ក្នុង​ក្រុង​មួយ​ចំនួន​ត្រូវ ​បាន​អភិវឌ្ឍ​ទៅ​ជា​ប៊ូទិក​»​។

លោក​បញ្ជាក់​ថា រហូត​មក​ដល់​ឆ្នាំ​នេះ «​នៅ​ក្នុង​ខេត្ត​សៀមរាប របស់​យើង​មាន​សណ្ឋាគារ​ប៊ូទិក​ប្រមាណ​ជាង​១០០​ទីតាំង​ដោយ​ក្នុង នោះ​ភាគ​ច្រើន​ពួក​គេ​អាច​មាន​ចំនួន​បន្ទប់​ចាប់​ពី​៥-១០ ទៅ​ជាង ២០​បន្ទប់​ប៉ុណ្ណោះ និង​មួយ​ចំនួន​ទៀត​មាន​ដល់​រាប់​សិប​បន្ទប់​»​។

និន្នាការ ​ថ្មី​ក្នុង​ការ​ស្វែងរក​កន្លែង​ស្នាក់​នៅ​របៀប​ប៊ូទិក​នេះ គឺ​វា​មាន​ភាព​ងាយ​ស្រួល​ទាំង វិនិយោគិន និង​ភ្ញៀវ​ទេសចរ​មក​ស្នាក់​នៅ​ផង​ដែរ​។

លោក​បញ្ជាក់​ថា ៖ «​ភ្ញៀវ​ទេសចរ​បរទេស​ដែល​និយម​ស្នាក់​នៅ​តាម​ប៊ូទិក ព្រោះ​ពួក​គាត់​ត្រូវ​ការ​លក្ខណៈ​ឯកជន​ភាគ​ច្រើន សុវត្ថិភាព​ខ្ពស់ និង​ភាព​ស្ងប់​ស្ងាត់​»​។

លោក ឆាយ​ហ៊ាង បាន​បន្ថែម​ថា ៖ «​ទន្ទឹម​នឹង​នោះ​វា​ក៏​ផ្តល់​ភាព​ងាយ​ស្រួល​ដល់​ម្ចាស់​សណ្ឋាគារ​ប៊ូទិក ដូច​ជា ងាយ​ស្រួល​ក្នុង​ការ​គ្រប់គ្រង និង​ចំណាយ​លើ​ការ​វិនិយោគ​ដើម​ទុន​តិច​ជាដើម​»​។

ទោះ​ជា​យ៉ាង​ណា បើ​យោង​តាម​អ្នក​វិនិយោទុន​ក្នុង​ស្រុក​នៅ​ក្នុង​វិស័យ​សណ្ឋាគារ គឺ​អ្នក​ស្រី ឧកញ៉ា ឆាយ ស៊ីវលីង បាន​អះ អាង​ថា តាម​ពិត​ទៅ​បើ​មើល​លើ​ទម្រង់​នៃ​ការ​វិនិយោគ​សម្រាប់​សណ្ឋាគារ​ប៊ូទិក ជា​ទូទៅ «​វា​មាន​រូបភាព​តូច​ពិត​មែន ប៉ុន្តែ​ការ​ចំ ណាយ​ដើម​ទុន​បែរ​ជា​ច្រើន​ជាង​លើ​ការ​វិនិយោគ​លើ​គម្រោង​សណ្ឋាគារ​ធម្មតា​ ខ្ពស់​ណាស់​»​។

ដោយ​លើក​ឧទាហរណ៍​ជាក់​ស្តែង​មក​ប្រៀបធៀប​បញ្ជាក់ អ្នក​ស្រី ស៊ីវលីង បាន​អះអាង​ថា ៖ «​ក្រុមហ៊ុន​របស់​យើង​មាន​ដី​ពីរ​ទីតាំង​ទំហំ​(​ជិត​១​ហិកតា​) ប្រហាក់​ប្រហែល​គ្នា​។ ទីតាំង​ទី​១ ត្រូវ​បាន​សង់​ជា​សណ្ឋាគារ​ធម្មតា​មួយ មាន​ទំហំ​ជាង​១០០​បន្ទប់ ដែល​មាន​ស្តង់ដារ​ចន្លោះ​ផ្កាយ​បី​ទៅ​ផ្កាយ​បួន​ដែរ​»​។

អ្នក​ស្រី​ បន្ត​ថា ៖ «​ប៉ុន្តែ​ដល់​ពេល​យើង​ធ្វើ​ការ​ប្រៀបធៀប​ជាមួយ​ការ​វិនិយោគ​លើ​ទីតាំង​ទី​២ ដែល​ស្ថិត​នៅ​ខាង​កើត​មាត់​ស្ទឹង​សៀមរាប ក្បែរ​ផ្លូវ​ជាតិ​លេខ​៦ ដោយ​សង់​ជា​សណ្ឋាគារ​ប៊ូទិក​ឈ្មោះ​លីណាយ៉ា​ (Lynnaya) ដែល​មាន​ត្រឹម​តែ​ចំនួន​៥០​បន្ទប់ ទើប​យើង​ដឹង​ថា ការ​វិនិយោគ​លើ​គម្រោង​សណ្ឋាគារ​ប៊ូទិក​អស់​ដើម​ទុន​ច្រើន​រហូត​ជាង​៣,៥០​ លាន​ដុល្លារ គឺ​ខ្ពស់​ជាង​ជិត​២​ដង ធៀប​ទៅ​នឹង​សណ្ឋាគារ​ធម្មតា​មាន​ទំហំ​ជាង​១០០​បន្ទប់​នោះ​ទៅ​ទៀត​»​។

អ្នក ​ស្រី ស៊ីវ​លីង បន្ត​ថា ៖ «​យើង​បាន​ចំណាយ​ពេល​វេលា​ជាង​១​ឆ្នាំ​កន្លះ ដើម្បី​សាងសង់​សណ្ឋាគារ Lynnaya មាន​តែ​៥០​បន្ទប់ ដោយ​រក្សា​ឲ្យ​នៅ​សល់​ផ្ទៃដី​ទំនេរ​ជាទី​ធ្លា​ផ្សេងៗ ជា​សួន​ច្បារ ជា​អាង​ហែល​ទឹក និង​សំណង់​បន្ទាប់​បន្សំ​។ នៅ​ពេល​បើក​ដំណើរការ យើង​ក៏ត្រូវ​ចំណាយ​ខ្ពស់​ជាង​ជិត​បី​ដង​ដើម្បី​ដំណើរ​ការ​អាជីវកម្ម​ សណ្ឋាគារ​ប៊ូទិក​ធៀប​ទៅ​នឹង​សណ្ឋាគារ​ធម្មតា​នោះ​ដែរ​»​។

អ្នក​ស្រី​ បាន​ពន្យល់​ថា បើ​នៅ​សណ្ឋាគារ​ធម្មតា ត្រូវ​ការ​បុគ្គលិក​មួយ​ក្រុម​៤-៥​នាក់ ដើម្បី​មើល​ថែ​ទាំ និង​បម្រើ​សេវាកម្ម​សម្រាប់​បន្ទប់​រវាង​ ៤-៥​ បន្ទប់​នោះ «​នោះ​នៅឯ​សណ្ឋាគារ​ប៊ូទិក យើង​ត្រូវ​ការ​បុគ្គលិក ​៤-៥​ នាក់ សម្រាប់​តែ​១​បន្ទប់​ទេ​» ព្រោះ​វា​ត្រូវ​មាន​ទាំង​អ្នក​ថែ​សួន​ឯកជន អ្នក​ថែទាំ​អាង​ហែល​ទឹក​ដាច់​ដោយ​ឡែក​អ្នក​ផ្តល់​សេវាកម្ម​ផ្នែក​ស្ប៉ា អ្នក​ផ្តល់​សេវាកម្ម​ទូទៅ​... ទាំង​នេះ​គឺ​ដើម្បី​ឆ្លើយ​តប​ទៅ​នឹង​លក្ខណៈ​ឯកជន​ជា​តម្រូវ​តាម​អតិថិជន​ ស្នាក់​នៅ​តាម​សណ្ឋាគារ​ប៊ូទិក។

ប៉ុន្តែ អ្នក​ស្រី ស៊ីវ​លីង បាន​ឯកភាព​ថា៖ «​ថ្វី​បើ​មាន​ការ​ចំណាយ​ខ្ពស់​សម្រាប់​សណ្ឋាគារ​ប៊ូទិក ក៏​ពិត​មែន ក៏​ប៉ុន្តែ​ទន្ទឹម​នឹង​នោះ សណ្ឋាគារ​ប៊ូទិក វា​ក៏​តម្រូវ​ឲ្យ​អតិថិជន​ដែល​មក​ស្នាក់​នៅ​ក្នុង​សណ្ឋាគារ​នោះ​ត្រូវ​ចំណាយ ​ប្រហែល ២​ដង ខ្ពស់​ជាង​ការ​ស្នាក់​នៅ​តាម​សណ្ឋាគារ​ធម្មតា​ដែរ​»​។

អ្នក ​ស្រី​បន្ត​ថា៖ «​អ្វី​ដែល​មាន​ភាព​ងាយ​ស្រួល​នោះ គឺ​អតិថិជន​របស់​សណ្ឋាគារ​ប៊ូទិក ភាគ​ច្រើន​ពួក​គាត់​ជា​បុគ្គល​មាន​ជីវភាព​ធូរធារ ហើយ​ក៏​មាន​ការ​ស្នាក់​នៅ​រយៈពេល​យូរ​ដែរ​»​។

«​សណ្ឋាគារ Lynnaya របស់​យើង គឺ​ផ្តោត​ទៅ​លើ​ភ្ញៀវ​ជា​ជនជាតិ​បារាំង​និង​អតិថិជន​វ័យ​កណ្តាល មក​ពី​ទ្វីប​អឺរ៉ុប រួម​ទាំង​ភ្ញៀវ​អាស៊ី​ខ្លះ​ដែរ​»​។ នេះ​បើ​តាម​ប្រសាសន៍​របស់​អ្នក​ស្រី ស៊ីវ​លីង​។ «​យើង​លក់​តម្លៃ​បន្ទប់​សណ្ឋាគារ​ប៊ូទិក​នេះ​ចាប់ពី​១២០​ដុល្លារ ដល់​ជាង​១​ពាន់​ដុល្លារ​ក្នុង​មួយ​បន្ទប់​»​។

លោក ភិន វណ្ណា នាយក​ក្រុមហ៊ុន​អចលនទ្រព្យ Cam-Globe និង​ជានា​យក​គ្រប់គ្រង​ទូទៅ​ប៊ូទិក​ម្លូ​ខ្មែរ វីឡា ដែល​មាន​ទីតាំង​នៅ​តាម​ផ្លូវ​សាលា​ឡត នៃ​ម្តុំ​វត្ត​ដំណាក់​។ លោក​បាន​រំព្ញក​ថា ពី​ដំបូង​ឡើយ​ទីនេះ​គឺជា​លំនៅឋាន​ធម្មតា ដែល​ស្ថិត​នៅ​លើ​ផ្ទៃ​ដី​ប្រហែល​១២០០​ម៉ែត្រ​ការ៉េ​។ ប៉ុន្តែ​ក្រោយ​មក​ម្ចាស់​ប៊ូទិក​បច្ចុប្បន្ន​នេះ​ក៏​បាន​ធ្វើ​ការ​វិនិយោគ​ ដើម្បី​កែប្រែ​ទៅជា​ប៊ូទិក​វិញ ព្រោះ​គាត់​បាន​មើល​ឃើញ​ពី​តម្រូវ​ការ​ទីផ្សារ​ខ្ពស់​កំពុង​កើត​មាន​ឡើង​។

លោក វណ្ណា បន្ត​ថា ៖ «​ម្លូ​ខ្មែរ វីឡា ជា​សំណង់​ឈើ​រចនាប័ទ្ម​ផ្ទះ​ខ្មែរ​បី​បួន​ប្រភេទ​ផ្សេងៗ​គ្នា ប៉ុន្តែ​មាន​តែ​៨​បន្ទប់​ប៉ុណ្ណោះ​»​។

លោក​បន្ថែម​ថា ៖ «​ដើម្បី​កែច្នៃ​ពី​លំនៅឋាន​មក​ជា​ប៊ូទិក គឺ​ត្រូវ​ប្រើ​ពេល​អស់​មួយ​ឆ្នាំ​ពេញ សម្រាប់​ជួស​ជុល​ផ្ទះ​ចាស់ សង់​សំណង់​ផ្ទះ​ថ្មីៗ​ខ្លះ រៀបចំ​ជា​សួន​ច្បារ ជា​អាង​ហែល​ទឹក និង​ការ​តុបតែង​ផ្នែក​ខាង​ក្នុង ហើយ​ទម្រាំ​នឹង​ចប់​នៅ​ពេល​នេះ​វា​ក៏​ត្រូវ​ការ​ចំណាយ​ប្រាក់​អស់​ប្រមាណ ៤០-៤៥​ម៉ឺន​ដុល្លារ​អាមេរិក​»​។

ចាប់​តាំង​ពី​ខែ​មេសា​កន្លង​មក ម្លូ​ខ្មែរ វីឡា បាន​ចាប់​ផ្តើម​សាកល្បង​ទទួល​ភ្ញៀវ​ឲ្យ​ចូល​ស្នាក់​នៅ​ជា​បណ្តើរៗ​ហើយ ដោយ​មាន​តម្លៃ​បន្ទប់​រវាង ៨០-១២០​ដុល្លារ​ក្នុង​មួយ​យប់ ហើយ​គ្រោង​នឹង​បើក​សម្ពោធ​ជា​ផ្លូវ​ការ​នៅ​ចុង​សប្តាហ៍​នេះ​។

លោក អាង គឹម​អ៊ាង ប្រធាន​សមាគម​ទីភ្នាក់ងារ​ទេសចរណ៍​កម្ពុជា (CATA – Cambodian Agent and Travel Association) បាន​ថ្លែង​ថា ថ្វី​បើ​សណ្ឋាគារ​ប៊ូទិក​នៅ​ក្នុង​ប្រទេស​កម្ពុជា ជា​ពិសេស​នៅ​ក្នុង​ខេត្ត​សៀមរាប និង​ទីក្រុង​ភ្នំពេញ មាន​លក្ខណៈ​ល្អ​ប្រសើរ​មិន​ចាញ់​នៅ​បរទេស ឬក៏​ល្អ​ជាង​នៅ​បរទេស​ក៏​ពិត​មែន ប៉ុន្តែ​បើ​ប្រៀបធៀប​ទៅនឹង​តម្លៃ​នៃ​ការចំណាយ​ស្នាក់នៅ គឺ​ភ្ញៀវ​ទេសចរ​គាត់​ចំណាយ​ធូរ​ថ្លៃ​រហូត​ដល់​ទៅជិត​៣​ដង ទាប​ជាង​តម្លៃ​សណ្ឋាគារ​ប៊ូទិក​ដូចគ្នា​នៅឯ​ប្រទេស​ថៃ និង​វៀតណាម​ដែល​នៅ​ក្បែរ​នេះ​។

លោក​បន្ត​ថា ៖ «​ជា​ទូទៅ​សណ្ឋាគារ​ប៊ូទិក​ហាក់​ដូច​ជា​ជ្រើសរើស​អតិថិជន​ជាន់​ខ្ពស់​បន្តិច ​មែន ប៉ុន្តែ​វា​កំពុង​មាន​តម្រូវ​ការ​ខ្ពស់​ពី​ភ្ញៀវ​ទេសចរ​វ័យ​កណ្តាល​ដែល​មាន​ មុខរបរ ឬ​ការងារ​មាន​ប្រាក់​ចំណូល​ខ្ពស់ ភាគច្រើន​ពួកគាត់​មកពី​ទ្វីបអឺរ៉ុប​។ ពួកគាត់​ចូលចិត្ត​ទីកន្លែង​មាន​ផាសុកភាព​ខ្ពស់ ស្ងាត់ស្ងៀម​មិន​អ៊ូអរ​គួបផ្សំ​ជាមួយ​សេវាកម្ម​របៀប​ប្រពៃណី​ល្អ​ប្រសើរ និង​មាន​បរិយាកាស​ល្អ ទាំង​នោះ​គឺជា​ចំណុច​ទាក់ទាញ​របស់​វា​»​។

លោក គឹម​អ៊ាង បន្ត​ថា ៖ «​លក្ខណ​ពិសេស​របស់​ក្រុម​សណ្ឋាគារ​ប៊ូទិក គឺ​មាន​លក្ខណៈ​តូច មិន​ឆើតឆាយ ប៉ុន្តែ​វា​ប្រកប​ដោយ​ភាព​ទាក់ទាញ​ដោយ​សារ​អ្នក​វិនិយោគ គេ​ប៉ិន​ប្រសប់​ច្នៃ​ប្រឌិត មាន​ទេពកោសល្យ​ក្នុង​ការ​រចនា​តុបតែង​ខុស​ពី​សាមញ្ញ​ភាព រួម​ទាំង​ធម្មជាតិ​នៅ​ជុំវិញ​នោះ​ស្រស់​បំព្រង​គួរ​ឲ្យ​ចំណាប់​អារម្មណ៍​ថែម ​ទៀត ដែល​យើង​មើលទៅ​លក្ខណៈ​ទាំង​អស់​នោះ​វា​អាច​ផ្តល់​ភាព​សុខដុម​ជា​អតិបរិមា​ ដល់​អ្នក​ស្នាក់​នៅ​បាន​»៕

ប្រភពដើមពី៖ ភ្នំពេញប៉ុស្តិ៍


ទាញយកកម្មវិធីតាមរយៈទូរសព័្ទដៃ:

បណ្តាញទំនាក់ទំនងសង្គម:

Facebook
 Instagram Youtube Line Twitter Linked Google Plus 

ទីតាំងការិយាល័យ

អគារលេខ២៦៦ ផ្លូវ ៥៩៨ សង្កាត់ភ្នំពេញថ្មី
ខណ្ឌសែនសុខ រាជធានីភ្នំពេញ ព្រះរាជាណាចក្រកម្ពុជា
លេខទូរស័ព្ទ: (+855) 23 6969 699
អ៊ីម៉ែល: sale@penghuoth.com
អ៊ីម៉ែល: info@penghuoth.com

ទំនាក់ទំនង
(+855) 15 90 6789